បាត់ដំបង៖ ខេត្តបាត់ដំបង គឺជាខេត្តមួយនៅភាគពាយ័ព្យនៃព្រះរាជាណាចក្រកម្ពុជា និងមានក្រុងមួយឈ្មោះក្រុងបាត់ដំបង។

តាមមន្ទីរទេសចរណ៍ខេត្តបាត់ដំបង បានឱ្យដឹងថា ក្រុងបាត់ដំបងសម្បូរទៅដោយ ស្ថាបត្យកម្មសំណង់បេតិកភណ្ឌល្អប្រណិតជាច្រើន ដែលបានបន្សល់ទុកតាំងពីសម័យបុរាណ រហូតដល់សម័យអាណានិគមបារាំង។

សំណង់ល្បីៗដែលបាននៅសេសសល់រហូតដល់សព្វថ្ងៃមានដូចជា៖ អគារសារមន្ទីរប្រវត្តិសាស្ត្រខេត្តបាត់ដំបង ស្ពានថ្មចាស់ ផ្សារណាត់ សារមន្ទីរវប្បធម៌ខេត្តបាត់ដំបង ស្ថានីយរថភ្លើង ផ្លូវ៣ខ្សែស្របនឹងស្ទឹងសង្កែ ផ្ទះលក់ទំនិញជាច្រើនត្រូវបានសាងសង់ជាល្វែងខណ្ឌ ផ្ដាច់ពីគ្នាដោយផ្លូវកាត់ទទឹង និងវត្តអារាមបុរាណ។

ទន្ទឹមនោះ ខេត្តបាត់ដំបងក៏មានទាំងសំណង់ប្រណិតទើបតែកសាងថ្មីជាច្រើនទៀត ដែលសម្បទាទាំងអស់នេះហើយ ជាគ្រឿងអលង្ការ ធ្វើឲ្យក្រុងបាត់ដំបងមានភាពទាក់ទាញដល់ភ្ញៀវទេសចរជាតិ និងអន្តរជាតិមកទស្សនាមានការកើនឡើងពីមួយឆ្នាំទៅមួយឆ្នាំ។

ថ្មីៗនេះ រដ្ឋបាលខេត្តបាត់ដំបង បានចាប់ផ្តើមយុទ្ធនាការ «ផ្ទះមួយខ្នង ដើមឈើមួយដើម» ដែលកាន់តែបន្ថែមសម្រស់ដល់ក្រុងបាត់ដំបង ឱ្យស្រស់ឆើតឆាយមួយកម្រិតទៀត៕